ليلة سقوط القناع كامله بقلم انجي الخطيب

الحقيقة المرة في قاعة المحكمة الجزء المعدل
وهو بيقدم أوراق الطلاق، مدحت ماكنش متخيل أبدًا إن الحقيقة كلها هتتفرش قدام القاضي وتكشف المستور عن الشقة والعربية.
رزع مدحت كوباية القهوة الساقعة على التربيزة، وضغط على زرار مكنة القهوة بعصبية. قدامه خمس دقايق بس ولازم ينزل. شقتهم القديمة بقت بالنسبة له زي صندوق ضيق، كل ركن فيها بيفكره ب 20 سنة جواز.. الجواز اللي قرر ينهيه من تلات شهور بكلمة واحدة.
افتكرت الأوراق؟
صوت إلهام جه من الطرقة. ما بقتش مراته، بقت مجرد إلهام.
مانسيتش.. مش عيل صغير أنا، رد مدحت وهو بيشرب القهوة المرة.
دخلت إلهام المطبخ. كانت

خاسة، والهالات السوداء تحت عينيها مخلياها كأنها كبرت عشر سنين في التلات شهور دول. مدحت بص للناحية تانية، كأنه هربان من مواجهة وشها.
ماكانش له لزوم تيجي، كنت هبعتلك حاجتك لحد عندك، قالتها وهي بتفتح الثلاجة وبترص العلب بإيد بتترعش.
كنت معدي من المنطقة، وبالمرة آخد المفاتيح.
للدرجة دي مستعجل تخلص مني؟
مدحت هز كتافه ببرود
يا إلهام بلاش نبدأ تاني، إحنا بينا اتفاق.
بينا اتفاق؟ رزعت باب الثلاجة وكملت بضحكة وجع طبعاً.. ما أنت طول عمرك اللي بتقرر لوحدك، وعليّا أنا التنفيذ.. 20 سنة على الحال ده.
بص مدحت في ساعته، مش عايز يتأخر
بقولك إيه، مش وقته، المحامي طلب نكون هناك بدري.
محاميك أنت، إلهام ابتسمت ابتسامة مكسورة وسخرت أنا ماعنديش فلوس لمحامين وأنت عارف كدة كويس.
مدحت نفخ بضيق
ما كنتِ خدتي من فلوسنا اللي في البنك.
فلوسنا؟ ضحكت إلهام ضحكة غريبة أول مرة يسمعها هو إحنا كان بينا حاجة مشتركة؟ أنت عمرك ما سيبت في إيدي فيزا ولا قرش أشيله للزمن.
إلهام، بس بقى! قام مدحت فجأة أهو ده اللي خلاني أمشي وأسيب البيت، العيشة بقت لا تطاق.
لا تطاق.. ردت بصوت واطي ودلوقتي حياتي بقت هي اللي جنة.. قاعدة في أوضة وصالة وأنا في الخمسين من عمري.
ما أنا عرضت عليكي أدفعلك إيجار مكان أحسن.
ولحد إمتى؟ لحد ما سها الهانم تطلب منك توقف الدفع؟
مدحت كان لسه هيرد، بس تليفونه رن.. منبه الميعاد.
لازم نمشي.
وصلوا المحكمة في صمت قاتل. مدحت كان سايق العربية الفولكس بتاعتهم، اللي كان طبيعي إنها تفضل معاه، ما هو اللي دفع تمنها.. أو ده اللي كان فاكره.
ابنك طارق هييجي؟ سأل مدحت عشان يكسر الصمت.
لأ.. قال مش قادر يشوف بيت أبوه وأمه وهو بيتهد.
كان المفروض ييجي يساندنا.
يساند مين فينا بالظبط؟
مدحت ما ردش. من يوم ما عرفوا ابنهم بالطلاق وهو مابينطقش معاه كلمة.
دخلوا المحكمة.. طرقات واسعة وصوت خطوات مكتوم وريحة أوراق ومكاتب. قدام القاعة كان المحامي مستني، راجل رفيع بنضارة وماسك ملف تقيل.
مدحت بيه! كله تمام، المحامي