وثيقة الوصاية كامله حكايات انجي الخطيب

إني مكنتش متجوزة راجل، أنا كنت متجوزة سجان بيتحكم في كل تفصيلة، ومستني اللحظة اللي يكتمل فيها سيطرته عليا.
صوت أحمد برة بقى بيخبط أقوى افتحي الباب يا جنة!
جنة أخدت نفس عميق، ورغم الرعشة اللي في إيدها، حست بقوة غريبة بتسري في عروقها. قوة القرار النهائي.
أنا مش هفتح يا أحمد. قالتها بصوت واضح وقوي لأول مرة، واللي كنت بتسميه علاقة، النهاردة انتهى رسمياً. لا أنا ولا فلوسي هنكون جزء من نظام أمك.
برة، خبط أحمد وقف فجأة. الصمت اللي جه بعده كان صمت انهيار كل حاجة. جنة مكنتش عارفة هي هتروح فين أو هتعمل إيه، بس كانت عارفة حاجة واحدة بس إنها الليلة دي، ولأول مرة من سنين، حرة. حرة من نظامهم، وحرة من حكمهم.
سابت التليفون، وراحت ناحية الدولاب، بدأت تطلع شنطة صغيرة، وتبدأ حياتها من جديد.. بعيد عن الوصاية، وبعيد عن أي حد يقرر قيمتها بكام قرش.
سمعت صوت خطوات أحمد وهو بيبعد عن الباب، وبعدها رقعة باب الشقة اللي هزت الحيطان. نزل. ساب لها البيت عشان تراجع نفسها، زي ما كان دايما بيحب يقول لما يحب يفرض رأيه بالضغط النفسي.
جنة كانت بتلم هدومها وهي بتعيط، بس دموعها مكنتش دموع ضعف، كانت دموع تطهير. كل قميص بتحطه في الشنطة كانت بتفتكر معاه موقف قلل فيه من شأنها أو حسسها إنها مجرد تكملة ديكور في حياته.
فجأة تليفونها رن تاني. كانت إيمان.
جنة! أنا قدام العمارة، انزلي حالاً، أنا مش هسيبك ليلة كمان في المكان ده.
أخدت شنطتها، وبصت بصه أخيرة على الصالة. المكان اللي كان المفروض يكون عش الزوجية بقى في عينيها دلوقتي مجرد أربع حيطان باردة. الورقة اللي عليها بيانات حساب حماتها لسه مرمية على السفرة. جنة قربت منها، مسكتها، وقطعتها ميت حتة، ورمت فتافيتها في نص الصالة.
نزلت السلم وهي حاسة إن الحمل اللي كان على كتافها بدأ يخف. أول ما شافت عربية إيمان، اترمت في حضنها وانفجرت في العياط.
خلاص يا حبيبتي، إنتي قوية، واللي حصل ده فوقك قبل ما العمر يضيع أكتر من كده، إيمان قالتها وهي بتطبطب عليها وبتحاول تهديها.
طول الطريق، جنة كانت ساكتة، بتبص من شباك العربية على شوارع القاهرة والناس اللي ماشية. كانت بتسأل نفسها إزاي كنت هعيش سنيني الجاية وأنا بطلب الإذن عشان أشتري لنفسي حاجة؟ إزاي كنت هربي ولادي في بيت الأب فيه شايف الأم مجرد حصالة؟
وصلوا بيت إيمان، دخلت جنة الأوضة اللي جهزتها لها صاحبتها. قعدت على السرير وفتحت تليفونها. لقت رسايل كتير من أحمد
إنتي فين؟
بلاش جنان، أنا عملت كده عشاننا، إنتي اللي كبرتي الموضوع.
ارجعي والصبح هنروح البنك سوا نخلص الإجراءات.
قفلت التليفون تماماً. مكنش في إجراءات، ولا كان في رجوع.
تاني يوم الصبح، جنة صحيت على ضوء الشمس. أول حاجة عملتها إنها كلمت مديرها في الشغل، طلبت منه يغير كلمة السر لكل حساباتها الرسمية، ويتأكد إن مفيش أي تغيير يحصل في تحويل المرتب إلا بإذن شخصي منها وبحضورها.
وبعدها، كلمت محامي. مكنش الموضوع موضوع فلوس، كان موضوع أهلية. كانت عايزة تثبت لنفسها وليه إن الخيال اللي كان بيعيبها فيه، هو اللي خلاها تتخيل حياة أحسن وتصمم إنها تعيشها.
القصة مخلصتش بوجع، خلصت ببداية جديدة. جنة رجعت لشغلها بهمة أكبر، والفلوس اللي كان أحمد عايز يحميها منها، استثمرتها في كورس ديكور متقدم كانت بتحلم بيه من زمان.
وفي يوم، وهي قاعدة في مكتبها الجديد، جالها إشعار على التليفون تم تحويل الراتب. ابتسمت وهي بتبص للمبلغ، مش عشان قيمته، بس عشان المرة دي، هي الوحيدة اللي عارفة القرش ده راح فين، وجيه منين، ومين صاحب الحق فيه.
تمت