صدمة اب حكايات انجى الخطيب
في الأوضة الكبيرة رعش فجأة وصوت صفارات إنذار غريبة بدأت تضرب في المكان كله.
مدحت وشه قلب ألوان وبص للكاميرات اللي في المكتب وصرخ إيه اللي بيحصل؟ مين اللي دخل السيستم؟.. وفجأة، الشاشات الكبيرة اللي كانت عارضة صور الأطفال اتقلبت كلها وبقت بتعرض بث مباشر لوشوشنا إحنا والمدير والمسؤولين اللي كانوا معاه.. وصوت سارة المدرسة رن في سبيكرات المكان كله وهي بتقول دلوقتي مصر كلها شايفة الأوضة الكبيرة يا مدحت.. البث ده واصل لأكبر جهة في البلد، واللعبة انتهت.
سارة مكنتش مجرد مدرسة، دي كانت ضابطة زرعتها الأجهزة الأمنية بقالها سنة عشان توصل للمكان ده، والانفجار اللي حصل فوق كان إشارة الاقتحام.. مدحت اتجنن وسحب مسدسه وهو بيصرخ هقتلك يا إبراهيم وهقتلها!.. بس قبل ما يضغط على الزناد، الباب الحديد اتفرتك وطلقات قناصة نزلت عليه زي المطر، ووقع مدحت بجد المرة دي وهو باصص للسقف بذهول.
القوات ملت المكان والكلبشات بدأت تلمع في إيد الحيتان الكبيرة اللي كانوا مستخبيين ورا الستار.. سارة قربت مني وطبطبت على كتفي وقالتلي حمد لله على السلامة.. لولا شجاعتك
ليلى بصتلي بعيون واعية أكبر من سنها بكتير وهمستلي بابا.. مستر مدحت مكنش أكبر واحد.. الفلاشة دي فيها الأسماء الحقيقية للناس اللي كانوا بييجوا بالليل.. الناس اللي سارة معرفتش توصلهم.. بصيت للفلاشة اللي في إيدي ولقيت مكتوب عليها بخط صغير أوي الجزء التاني من اللعبة.. رفعت عيني وبصيت للمدرسة اللي كانت بتتحرق ورايا، وعرفت إن المشوار لسه طويل.. والوحوش لسه ليهم ديول في كل حتة!
الفلاشة في إيدي كانت بتحرق صوابعي، كأنها قنبلة موقوتة تانية بس من نوع أخطر.. بصيت لليلى بذهول، الطفلة اللي كان المفروض بتلعب بالعرائس، شايلة في جيبها سر يوقع حكومات.. سألتها بصوت واطي جبتي دي منين يا ليلى؟، ردت عليا بمنتهى الهدوء اللي يخوف لما مستر مدحت كان بيصورنا، كان فيه درج سري ورا المكتب بيفتحه بمفتاح صغير، شفته وهو بيخبي الفلاشة دي وبيقول لواحد في التليفون دي تأميني
ركبت العربية وقفلت القزاز، وسارة كانت لسه مشغولة مع القوات والقبض على السمك الصغير.. شغلت الفلاشة على شاشة العربية، وفتحت أول ملف.. قلبي سقط في رجلي.. مكنتش مجرد أسماء، دي كانت فيديوهات لقاءات بتتم في فيلات وقصور فخمة، وشوش بنشوفها كل يوم في الأخبار، وزراء، رجال أعمال، وحتى ناس كنا بنفتكرهم قدوة لينا.. الكل كان بيمضي وبياخد نصيبه من لحم الأطفال.
وفجأة، شاشة العربية اتشوشت، وظهرت رسالة مكتوبة باللون الأحمر إبراهيم.. إحنا شايفينك دلوقتي من كاميرا العربية.. لو الفلاشة دي متمسحتش في ظرف دقيقة، العربية هتتحول لقبر ليك ولليلى.. مفيش فايدة من الهرب، إحنا اللي بنحرك العرايس يا إبراهيم.
بصيت في المراية، لقيت عربيتين سود جيمس بيقفلوا عليا الطريق من قدام ومن ورا، ورجالة لابسين بدلات سودة ونظارات نزلوا وهما ماسكين أجهزة في إيديهم.. ليلى مسكت إيدي وقالتلي بابتسامة غريبة متقلقش يا بابا.. أنا بعتت النسخة اللي على الفلاشة لكل القنوات في مصر من تليفون سارة قبل ما تخلص شحن.. النسخة
في اللحظة دي، سمعنا صوت انفجار تليفونات الناس اللي كانت واقفة حوالين المدرسة.. الكل طلع موبايله بذهول، الفيديوهات بدأت تنتشر زي النار في الهشيم على فيسبوك وواتساب، مصر كلها شافت الحقيقة في لحظة واحدة.. الرأي العام اتقلب في ثانية، والرجالة اللي كانوا محاصرين العربية وقفوا مكانهم، بعد ما جالهم أمر بالانسحاب فوراً لأن الغطاء اتكشف.
فتحت باب العربية ونزلت وأنا شايل ليلى على كتفي، والناس حوالينا بدأوا يهتفوا ويصوروا البطلة الصغيرة.. بصيت للسما وخدت نفس طويل لأول مرة من سنين، بس وأنا ببعد عن المكان، لمحت عم صابر واقف بعيد وسط الزحمة، لابس بدلة غالية جداً وبيركب عربية مرسيدس سوداء، وقبل ما يقفل الباب، غمزلي بعينه وشاورلي بعلامة النصر..
فهمت وقتها إن عم صابر مكنش مجرد فراش، ولا مجرد ضحية.. ده كان العقل المدبر اللي خلص على مدحت عشان ياخد مكانه، واستخدمنا إحنا عشان يحرق المنافسين بتوعه ويصفي الساحة لنفسه.. اللعبة مخلصتش، اللعبة يادوبك بدأت بجد، والوحش الكبير لسه بيلبس قناع الرجل الغلبان.
تمت
حكايات انجى
