حفدتي والمجهول بقلم انجي الخطيب
المكان كله محاصر.. ارمي سلاحك!.
الضرب زاد بره، وفجأة باب الأوضة اتفتح بعنف. واحد ملثم دخل وسحبني من شعري من تحت السرير وهو بيصرخ فين المفتاح يا ولية؟. ليلى صرخت صرخة سمعت الجيران كلهم، والراجل رفع السلاح في وشها.
من غير ما أفكر، وبقوة مكنتش أعرف إنها عندي، غرزت ضوافري في عينه بكل غلي، وعضيت إيده اللي ماسكة السلاح. الراجل اتوجع والسلاح وقع منه، وفي ثانية كان الظابط كريم داخل الأوضة وأطلق النار على كتفه وشله تماماً.
الدنيا هديت بعدها بشوية، والبيت اتملا عساكر وظباط. كريم قرب مني وأنا لسه حاضنة ليلى في الأرض وبنترعش، أخد المفتاح من إيدي وهو بيمسح دمه اللي سال من جرح في جبهته وقال بصوت هادي خلاص يا مدام.. الكابوس انتهى بجد المرة دي.
ليلى بصت للظابط وسألته ببراءة مرعبة يعني بابا وماما مش هيجوا ياخدوا
الظابط نزل لمستواها وباس راسها وقالها بابا وماما راحوا مكان بعيد يا ليلى.. ومحدش هيقدر يلمس شعرة منك طول ما إحنا موجودين.
أخدت ليلى في حضني وخرجنا من البيت اللي ريحته بقت كلها بارود ودم. بصيت للسما ولقيت الفجر بيشقشق، نور خفيف بيمسح سواد الليل. عرفت إن ليلى مش هترجع تاني تدور في الزبالة، ولا هتحتاج تخبي أسرار الكبار في عروستها.
النهاردة ليلى هتبدأ عمر جديد، وأنا هعيش اللي فاضل لي من عمر بس عشان أعوضها عن كل وجع شافته، وأعلمها إن مش كل الكبار وحوش.. وإن حقها رجع، حتى لو كان التمن غالي أوي.
بعد مرور سنة، كانت الشمس مالية بلكونة بيتنا الجديد في إسكندرية، بعيد عن زحمة القاهرة وذكرياتها اللي بتهد الحيل. ليلى كانت قاعدة على الترابيزة، ماسكة ألوانها وبترسم، وشها مكنش شاحب زي زمان، بالعكس،
أنا كنت واقفة في المطبخ بعملها الأكلة اللي بتحبها، وبصيت عليها من بعيد وقلت في بالي سبحان اللي بيحيي العظام وهي رميم. ليلى مكنتش بس طفلة نجت من الموت، دي كانت معجزة ماشية على الأرض.
الظابط كريم فضل على تواصل معانا، وفي يوم جه يزورنا ومعاه أخبار نهائية. قعد وشرب الشاي وقاللي بهدوء يا مدام، القضية اتقفلت تماماً. الشبكة كلها وقعت، والمفتاح اللي ليلى كانت شايلاه فتح خزنة فيها ملفات كانت كفيلة تخلي الرؤوس الكبيرة تتشال من مكانها. ليلى دلوقت تحت حماية الدولة، بس قانونياً.. هي بنتك إنتي.
ليلى سمعت الكلمة دي، سابت الألوان وجريت عليا، حضنتني وقالت يعني خلاص يا تيتة؟ مفيش حد هييجي ياخدني؟.
بست إيدها وقلت لها محدش يقدر يا حبيبتي، إنتي دلوقت
في اليوم ده، ليلى عملت حاجة غريبة، أخدت عروستها القديمة اللي كانت مخبية فيها المفتاح، ونزلت معايا على البحر. وقفت قدام الموج، وبصت للعروسة اللي كانت شاهدة على كل وجعها، ورمتها بكل قوتها في المية. فضلت تتفرج عليها وهي بتغرق وتبعد، وكأنها بترمى معاها كل ذكريات ليالي الزبالة وكوابيس نيرمين وشريف.
لفت ليا وضحكت ضحكة صافية، ضحكة طفلة لسه بتبدأ حياتها من جديد. في اللحظة دي بس، حسيت إن نيرمين بنتي، رغم كل اللي عملته، كفرت عن ذنبها في آخر لحظة لما بعتت ليلى ليا.
مسكت إيدها ومشيت معاها على الرمل، وأنا عارفة إن اللي جاي مش هيكون سهل، بس على الأقل مفيش فيه خبايا، مفيش فيه كدمات، ومفيش فيه جوع. النهاردة ليلى بتنام وهي شبعانة حب، وأنا بنام وأنا مطمنة إن الأمانة وصلت لبر الأمان.
تمت
بقلم
